maskin katong di pa ta magkaila
Gipangita nako tong
katong nakaila kanako
katong nakapangita nuon ko
kay naa'y nangita kanako.
Daghan man ko'g nailhan
apan ambot
dili lang gyud to sila akong gipangita
Ug nakit-an taka
karon
kuyog sa mga nakakita
ug Imo sab ubang gipangita,
duyog sa mga wala damhang gipakita
Karong ulahing panag-uban.
Kaning kagabhiong hapsay ang pag-abi-abi
Duyog sa kalinaw
sa pagtapok-tapok
sa kainit sa panaghiglaay
ug pamahulay
klaro Kanimo ang umaabot nga kagubot.
Ang kahayag karong gabhi-una
mao ang paghinumdum
niining mga kinabuhing Imo nang pagabiyaan
Sa kaguol ug kaisog
Gidawat Nimo ang tanan.
Nakit-an taka.
Nasabtan nako akong pagpangita.
Niining gabhiuna.
Sa Imong lawas
sa pagpangandoy nga mabulahan nga maka-uban ka.
pruweba sa pagpakatao ug paghigugma.
Sa Imong dugo
putli ug gigahin lang kanamo,
tuburan ug hinungdan niining kinabuhi.
Karong gabhiuna.
Salamat sa pagpangagda
Mangaon kita!